قصيدة للشاعر جان حجّار يرثي فيها
والده المرحوم لطفي حنا حجّار
بو جان
وين الي قلبو للعطف منبع وين العا وهج محبتو داب الحديد
وين الي كانت كلمتو مرجع يا مدرسة للكيف والعيش الرغيد
يا كرم خليت الدني تشبع من ايدك عناقيد وقناني نبيد
بستان كنت الخير ما بتقطع كم مارق على الدرب منك مستفيد
يا تارك القصدان تتوجع يا بينا ويا بيتنا وبيت القصيد...
بالتخت ست شهور ما تزعزع ايمانك العملاق والعزم الشديد
متل الجبل ضلَيت ما بتركع جبَار كنت ومارد صمودك عنيد
بطَل تا يشفيك الدوا ينفع وحب الحياة الفيك ما بطَل يزيد
همك الكلمة ناعمة تطلع همك مشاعرنا ما تتخدَش أكيد
همك البسمة بقلبنا تزرع والكل يبقى بهالعمر راضي وسعيد
ما كان منك بالدني أروع وألله كتبلك تنطفي بليلة العيد
وحتى هدايا العيد تتوزع بعتنا المناعي والدمع طابع بريد...
لولا البكا بيردك المدمع شلال كان بليلة العيد المجيد
لولا الندا منا السما بتسمع كنا ركعنا عالجمر نتلي النشيد
لولا الحفا تاترجع بيشفع كنا منمشيلك حفا فوق الجليد
لولا الفدا بيرضيك وبترجع كانت فداك قلوبنا ودم الوريد...
ولولا انتهى هالعمر ما تفزع بتضل فينا درَة العقد الفريد
عالعيد حبيت الشمل تجمع ولو صار وجهك للأبد عنا بعيد
بيضل نورك فوقنا يسطع كلما عا كلمة كاسكن ترتفع ايد
وبكل سنة عالعيد رح ترجع منعاهدك رح ننطرك عاطول
وكلما رجع ميلاد ترجع من جديد...
ايلمر 24-12-2006
